"O obxectivo é sensibilizar a toda a cidadanía e a outros sectores da cidade do difícil momento que atravesa a cultura, facela consciente da importancia estratéxica da cultura para o presente e futuro de Compostela, e tomar conciencia de que cada un/unha de nós pode axudar recoñecendo a riqueza e diversidade artística e consumindo os produtos e servizos culturais que se ofrecen na cidade", explicou a concelleira.

A participación de axentes culturais no programa dará como resultado unha radiografía das empresas, profesionais e artistas de Santiago, co obxecto de cuantificar e caracterizar as industrias culturais. Con este directorio de axentes culturais e o coñecemento adquirido durante o proceso de captación, o grupo de cultura do concello poderá deseñar novas actividades e accións de promoción de cara a 2021, coa intención de dar a coñecer o talento de Compostela e estimular o consumo cultural, nas súas diferentes formas (pintura, libros, discos, entradas ou abonos a cine, teatro, concertos, exposicións, talleres...).

Calquera profesional, artista ou empresa da área de Compostela que desenvolva a súa actividade ou ofreza de forma regular ou con certa frecuencia produtos ou servizos culturais na cidade, poderá inscribirse a través do formulario que estará dispoñible na web do Cersia e no final desta nova. De momento só se poderán inscribir neste directorio cultural as persoas individuais e empresas que formen parte das industrias culturais (artes visuais, artes escénicas, música, audiovisual e edición de libro), co obxectivo de ampliar o directorio no futuro con industrias creativas.

Ademais, aproveitando o Nadal 2020, está prevista a realización dunha campaña para xerar conciencia da importancia de apoiar o sector consumindo cultura.

O PROGRAMA COMPOSTELA MÓVESE
Este actividade forma parte do programa municipal "Compostela Móvese 2020 COVID19" aprobado con data de 20 de abril de 2020 e no que se recollen entre outros os obxectivos que se reproducen a continuacion:

- Impulsar medidas de reactivación económica a curto, medio e longo prazo nun espazo de concertación cos axentes económicos da cidade, que permita aos mesmos afrontar con información fiable e medidas útiles de consenso a crise económica derivada da emerxencia sanitaria provocada polo COVID19 e as sucesivas crises da mesma índole que poidan acontecer nun futuro.

- Promoción das industrias culturais e creativas como un sector económico estratéxico para o desenvolvemento económico no Concello de Santiago de Compostela pola elevada tradición, infraestrutura e recursos humanos cualificados, cuxa relevancia en termos de xeración e fixación de emprego é fundamental no novo rexurdir da cidade, definíndoa como a primeira urbe de Galicia para o lecer, mellorando a nosa calidade de vida e aumentando o seu atractivo.

Documentos relacionados

• Formulario de inscrición